Тропарь святителей, глас 4
Яко апостолов единонравнии/ и вселенныя учителие,/ Владыку всех молите/ мир вселенней даровати// и душам нашим велию милость.
Кондак святителей, глас 2
Священныя и боговещанныя проповедники,/ верх учителей, Господи,/ приял еси в наслаждение благих Твоих и упокоение:/ труды бо онех и смерть приял еси паче всякаго всеплодия,// Едине прославляяй святыя Твоя.
Молитва святителям Василию Великому, Григорию Богослову и Иоанну Златоусту
О пресветлии светильницы Церкве Христовы, Василие, Григорие и Иоанне, светом православных догматов вся концы земли озаривший и мечем слова Божия хульных смущения и шатания ересей угасившия! Припадающе к вашему милосердию с верою и любовию из глубины души вопием: предстояще престолу Пресвятыя, Единосущныя, Животворящия и Нераздельныя Троицы, за Нюже словом, писанием и житием добре подвизастеся и души своя полагаете, всегда молитеся Ей, да укрепит и ны в православии и единомыслии, и непоколебимей даже до смерти исповедании веры Христовы, и во вседушевнем послушании Его Церкви Святей; да препояшет ны с высоты силою на вся невидимыя и видимыя враги наша; да соблюдет Церковь Свою незыблему от неверия, суеверия, ересей и раскола; да дарует народу нашему долгоденствие и во всем благое поспешение; пастырем нашим да подаст духовное трезвение и ревность о спасении пасомых, властем суд и правду, воином терпение, мужество и одоление на враги, сирым и вдовицам заступление, болящим исцеление, юным благое в вере возрастание, старцам утешение, обидимым заступление и всем вся, ко временней и вечней жизни потребная, яко да в мире и покаянии, желанием спасения горяще, Господеви работающе, добрым подвигом подвизающеся, течение наше скончаем и сподобимся в Небеснем Царствии купно с вами всегда пети и славити пресвятое и великолепое Имя Отца и Сына и Святаго Духа во веки веков. Аминь.
В этот день в нашем храме по традиции Божественная литургия была совершена на церковнославянском и греческом языках. Эта практика — дань памяти Вселенским учителям и святителям Василию Великому, Григорию Богослову и Иоанну Златоустому, которые думали, разговаривали, совершали богослужения на этом языке и писали письмена в защиту православной веры.
Ἅγιος ὁ Θεός, Ἅγιος Ισχυρός, Ἅγιος Αθάνατος, ἐλέησον ἡμᾶς.